NUTK-İ ŞERÎF
Nûr-i tevhîd ile pâk et kalbini eyle debbâğ
Tâlib-i Hakk olana bir lahza yok gaflet mesâğ
Nâra yanmak şân olur nûr-i visâl 'uşşâkına
Yanmadıkça nâra ermez nûra hiç bir şeb çerâğ
Cümle ahvâlinde dâim ol murâkıb zâtına
Menzil al 'aşkın sırâtından geçüp sol ile sâğ
Gülşen-i Hakk'a gerek bülbül gibi feryâd ü zâr
Kadr-i gülzârdan haberdâr olamaz sîretde zâğ
Pertev-i vahdet tecellî eylemez bir dilde kim
Olmaya envâr-ı tevhîd ile dilinde insıbâğ
Cilvegâh-ı kûy-i bezm-i lâ-mekâna ermedi
Geçmeyenler sûret ü ma'nâda sahrâ ile dâğ
Fakr ile fahr eyleyen mahv eyleyüp zıll-i vücûd
Dü cihândan kenz-i lâ yefnâ bulup oldu ferâğ
Dâimâ tehzîb et dil mülkünü takrîb için
Meyvedâr olmaz eğer orman olmaz ise bâğ
'Âşıkın seyrânıdır milk-i ebedde ebedî
'Aşka olmaz intihâ 'uşşâka hiç yokdur durâğ
Derde dermân etmedi Sâmî visâl-i zâtına
Açmadıkça nâr-ı 'aşkı sînede dâğ üzre dâğ
Şeyh Abdurrahmân Sâmî Saruhânî
Kaddesallahu Sırrahu'l-Âlî
0 yorum:
Yorum Gönder