Yeter Etdin Bu Fânî Zevke Rağbet

NUTK-İ ŞERÎF

Yeter etdin bu fânî zevke rağbet

Efendi âkil ol fikr et me'âli

Dilersen Hazret-i Mevlâ'ya kurbet

İbâdet eylemekden olma hâlî

Eğer sâlik yolunda ola sâdık

Olur ol mahzen-i sırr-ı hakâık

Olagör sohbet-i dildâre lâyık

Yeter etdin sivâya iştigâli

Tulû' etse kaçan sırr-ı hakîkat

Komaz ol tâlib-i sâdıkda zulmet

Şu kim etdi semâ-yı kalbe himmet

Safâya erdi bedr oldu hilâli

Şu cân kim sırr-ı "ev-ednâ"ya erdi

Beğim ol matlab-ı a'lâya erdi

Safâ-yı zirve-i ulyâya erdi

Riâyet eyleyen saff-ı ni'âli

Bakıp kalma nükûş-ı kâinâta

Çalış ma'nâya er bâkî hayâta

Hüdâyî vâsıl oldu nûr-i zâta

Geçen 'âşık celâli vü cemâli

Azîz Mahmûd Hüdâyî

Kaddesallahu Sırrahu'l-Âlî