Bu Dünyânın Meseli Bir Ulu Şâra Benzer

NUTK-İ ŞERÎF

Bu dünyânın meseli bir ulu şâra benzer

Velî bizim ömrümüz bir tîz bâzâra benzer

Her kim bu şâra geldi bir lahza karâr kıldı

Gerü dönüp gitmeği gelmez sefere benzer

Bu şârın evvel tadı şehd ü şekerden şîrîn

Âhir acısını gör şu zehr-i mâra benzer

Evvel gönül almağı hûblara nisbet ider

Âhir yüz döndürmeği 'acûz mekkâra benzer

Bu şârın hayâlleri türlü türlü hâlleri

Aldamış gâfilleri câzû 'ayyâra benzer

Bu şârda hayâllerin haddi vü şumârı yok

Bu hayâle aldanan otlar davara benzer

Bu şârdan üç yol çıkar biri cennet biri nâr

Birisinün arzûsu maksûd dîdâra benzer

Bu şârın sultânı var cümleye ihsânı var

Sultân ile bilişen yoğ iken vâra benzer

Kendi mikdârın bilen bildi kendi hâlini

Velî dahi 'aşk ile evvel bahâra benzer

Bîçâre Yûnus'u gör derd ile hayrân olmuş

Anın her bir nefesi şehd ü şekere benzer

Yûnus Emre

Kuddise Sırruh