Zikr ile Âyine-veş Her Kim ki Oldu Sîne-sâf

NUTK-İ ŞERÎF

Zikr ile âyine-veş her kim ki oldu sîne-sâf

Her kemâlât-ı hüviyyet ona eyledi tavâf

Sırr-ı Kur`ân ile seyrân eyleyen 'âriflere

Rûh-i ankâsına menzilgâh oldu kûh-i kâf

Menzil-i nâsûtdan tecrîd ile tefrîd eden

Hıl'at-i lâhût ile buldu hakîkat ittisâf

Vahdetin bahrine emvâc zılâl-i kâinât

Nokta-i tevhîd-i zâtda zâtına oldu muzâf

"Lî ma'allah"a erişir cezbe-i Rahmân ile

Câmi'-i kalbinde sıdk ile edenler i'tikâf

Şem'a-i kalbin yakan sıdk ile Allah'a akan

Nehr olup bahri bulan 'aczin etti i'tirâf

Kenz-i istiğrâk ile bul Sâmiyâ hakka'l-yakîn

Tûtî-i taklîd-güzâr olma edüp lâf ü güzâf

Şeyh Abdurrahmân Sâmî Saruhânî

Kaddesallahu Sırrahu'l-Âlî