Cân ü Dilden Hâlık'ı Zikr Edelim

NUTK-İ ŞERÎF

Cân ü dilden Hâlık'ı zikr edelim

Hoş se'âdet ehli etmiş Hakk bizi

Lutf-i bî-pâyânına şükr edelim

Hoş se'âdet ehli etmiş Hakk bizi

Ehl-i îmân ehl-i İslâm eyledi

Bunca lutf u bunca in'âm eyledi

Fazl ü ihsânını itmâm eyledi

Hoş se'âdet ehli etmiş Hakk bizi

Etdi lutfundan Habîb'in ümmeti

Hem nasîb etdi serây-ı vahdeti

Umarız envâ'-ı feth ü nusreti

Hoş se'âdet ehli etmiş Hakk bizi

Yardım etdi çün 'inâyet 'askeri

Rehber oldu enbiyânın serveri

Eyledi nûr-ı hakîkat mazharı

Hoş se'âdet ehli etmiş Hakk bizi

Şems-i vahdetden erişdi sırr-ı nûr

Hâsıl oldu kalbe envâ'-ı sürûr

Ey Hüdâyî ola gör 'abd-i şekûr

Hoş se'âdet ehli etmiş Hakk bizi

Azîz Mahmûd Hüdâyî

Kaddesallahu Sırrahu'l-Âlî